Iniciativa pol Asturianu nes Ondes realizó una entrevista al conocíu ciclista asturianu Samuel Sánchez, ún de los destacaos del pelotón internacional dende va años polos sos ésitos deportivos, como la medalla d'oru nos Xuegos Olímpicos, o podiums na Vuelta España. Na entrevista, Sánchez afitó que "la llingua asturiana ye dalgo mui de nueso y nun hai que dexar que muerra", y amás dexó bien clara la so postura sobre l'estatus que necesita l'idioma d'Asturies: "l'asturianu tendría de ser oficial".

Dende Iniciativa pol Asturianu treslladaron la so felicitación al ciclista asturianu pol so compromisu abiertu cola llingua asturiana. Dende Iniciativa consideren que "la so entrevista ye bona amuesa de la opinión de la mayor parte de los asturianos, que nun quieren que muerra la llingua de so, pero tien un especial valir pola so postura de figura pública".

Amás, manifiesten dende Iniciativa que "nun ye la primer vegada que personalidaes públiques amuesen el so sofitu al asturianu nel programa y nes actividaes d'Iniciativa pol Asturianu. Actores como María Cotiello y William Miller o'l músicu Mario Fueyo "Dark la eMe" son dellos exemplos, nun trabayu que busca concienciar a los asturianos de la importancia d'implicase na recuperación y futuru del asturianu".