Depués de cinco díes d'enzarru sindical, los representantes de CC.OO, UGT, Sicepa-Usipa, Satse y Usae caltuvieron ayeri un nuevu aconceyamientu con Celia Gómez, xerente del SESPA pa la que dende les organizaciones sindicales pidíen la dimisión pola so falta de voluntá de diálogu respeuto a les midíes de recorte plantegaes ya impulsaes dende'l gobiernu asturianu, con un aumentu de xornada llaboral que dexaría a los profesionales sanitarios asturianos como los que más hores trabayaríen de tol estáu español.

Nesi aconceyamientu, según los sindicatos, Gómez amosó un cambiu de talante, accediendo a negociar dalgunos puntos de la reforma, como les bonificaciones o los turnos rotatorios, too ello siempres mirando por caltener el mayor númberu de puestos de trabayu posibles. Sicasí, consideren esto como un triunfu parcial, ya que la base de los axustes, l'aumentu de la xornada llaboral pal personal sanitariu, sigue siendo innegociable, y tendrá les sos consecuencies negatives pa la plantilla y pa los y les usuaries.