Les dos sentencies declaren nulu, "por nun ser conforme a derechu", l'alcuerdu plenariu de 8 de xunu de 2001 nel que se aprobaron les ordenances municipales sobre la oficialidá de la llingua. Foi la Delegación del Gobiernu español n'Asturies, en 2001 con Mercedes Fernández (PP) al frente quien presentó un recursu contra l'alcuerdu plenariu.

El fallu del Supremo ratifica la sentencia dictada pol TSJA señalando que "no existe ninguna declaración en el Estatuto de Autonomía que disponga que el bable tiene el carácter de lengua oficial en Asturias". El tribunal español recordó que "las corporaciones locales carecen de competencia para declarar la oficialidad de una lengua, dentro o más allá de los límites del municipio".

Daniel Cueli, voceru d'Andecha Astur en Nava, calificó la sentencia como "un actu represivu más", amestando que "nun ye entendible que la equiparación de los derechos llingüíticos de los vecinos y vecines d'un conceyu seya illegal, que la igualdá sea illegal, que la democracia mesma seya illegal n'Asturies". Cueli fizo finca en que la falta d'oficialidá xenera problemes democráticos, "l'exemplu ye qu'un conceyu asturianu nun pue regular, nunes ordenances municipales, la igualdá de derechos de los sos vecinos y vecines y la igulaadá de tratu de la llingua d'Asturies y del castellán". El voceru d'Andecha Astur en Nava criticó que namás Andecha punxere el recursu de casación y que'l Conceyu "el primer interesáu en defender los sos alcuerdos y los derechos de los vecinos"nun ficiere res, recordando que'l PSOE aprobó les ordenances en 2001 colos sos votos. Andecha Astur va asoleyar una valoración oficial nes prósimes hores.  

Pa Asturianistes por Nava el fallu "desprotexe a la cultura asturiana y la llingua qu'usa 'l pueblu". El conceyal Emilio Ballesteros recordó que "l'asturianu nun ye un problema, porque ye como fala davezu la xente, pero decisiones d'esti calter son les qu'enquisten la situación y xeneren un problema alredor de la llingua".

Dende'l PP, el voceru José María Osoro defendió la sentencia al recordar que si nun hai un Estatutu d'Autonomía que faiga referencia al asturianu, "un conceyu nun pue declarar la oficialidá".

Les ordenances aprobaes en 2001 permitíen a los vecinos "relacionase col ayuntamientu n'asturianu o n'español", amás de recibir les notificaciones municipales nestes dos llingües.