La convocatoria de la Xunta pola Defensa de la Llingua Asturiana pa esti sábdu 7 de febreru sofitáronla cientos de persones, dalgo más de mil persones, nel so recorríu ente la Estación del Norte d’Uviéu y la sée de la Conseyería d'Educación y Ciencia, na Plaza España.

 La movilización foi sofitada por delles organizaciones como los sindicatos SUATEA, FETE-UGT y CCOO-enseñanza, les organizacones polítiques y sociales como Andecha Astur, Darréu, Fai! o UNA. InfoAsturies ufre una galería de semeyes del manifestamientu. 

Nel manfestamientu reclamóse la oficialidá, pidióse la dimisión de la directora de Maxisteriu Gloria Tellez darréu y desixóse al Rector y al Conseyeru d’Educación una solución yá pa la situación de la llingua na Universidá y nel sistema educativu. 

Paula Cristobal, vocera de la Xunta, foi la encarada de facer la intervención final na que se denunció la situación de la llingua asturiana nel sistema educativu, que “dexa ver a les clares que la política de promoción llingüística que nos quieren vender ye un fraude". 

Dende la Xunta  aseguraron que la formación del profesoráu “ta en peligru” y pidieron “la creación d’una Mención de Llingua Asturiana que permita la formación de los futuros mayestros y mayestres de Llingua Asturiana y la presencia d’asignatures de Llingua Asturiana nos estudios comunes d’Educación Infantil y Primaria en Maxisteriu, que permita la formación mínima necesaria pa que cualquier futuru mayestru o mayestra pueda desarrollar la so actividá docente na realidá sociollingüística d’Asturies, garantizando la igualdá de derechos llingüísticos y educativos de los neños y neñes falantes d’asturianu".

• Galería de Semeyes d'InfoAsturies

Share Link: