Llogotipu de Xega

Por señalar dalgunos casos anteriores podemos recordar les cifras que, añu tres añu, vieno ufriendo esi periódicu referentes a las movilizaciones del Argullu LGTB cellebraes en Madrid. Frente a los datos recoyidos por otros medios, que falen de centenares de miles d’asistentes, LNE mengua dicha movilización a decenes de miles.

Cuando se plantega la necesidá de que la imaxen a presentar se refiera al llema de convocatoria de la manifestación o que faga referencia al conteníu políticu de la misma, LNE anecia en presentar imáxenes frívoles, estereotipaes, distorsionaes, que nun recueyen l’espíritu col que se convoca dicha manifestación.

Cuando l’alderique sobre’l reconocimientu de los derechos de llesbianes y gais al matrimoniu taba nel puntu cimeru, LNE abrió les sos tribunes a lo más reaccionario del pensamientu social, sirviendo de amplificador pa les voces de la homofobia. Quienes defendimos posiciones diferentes y socialmente igualitaries quedemos arrequexaos de forma sistemática a la seición de Cartes al director.

Agora que’l movimientu LGTB algamó la plena equiparación llegal el decanu de la prensa asturiana toma como centru de sus invectivas al colectivo transexual. Asina, el pasáu mes de mayo, coincidiendo con una movilización en Xixón contra la homofobia y la transfobia, LNE publicó la noticia con un titular que, como mínimo, podríemos considerar como escandalosu y malintencionáu: “Los transexuales piden puntos para las oposiciones”, nun claru intentu por xenerar una reacción social contraria a les reivindicaciones  del colectivu nun momentu delicáu de crisis económica al reducir la demanda (distorsionada) a una petición de privilexos.

Esta última selmana del añu 2009 foi otra vuelta’l coleutivu transexual la víctima d’un pensamientu reaccionariu y transfóbicu. La información referida a la operación de Mané Fernández  presentóse de forma sensacionalista y maliciosa. Dellos son los aspectos a destacar d’ella. Per un llau, la incapacidá pa reconocer un fechu científicamente probáu a nivel mundial: la esistencia de persones transexuales nes que nun esiste una correspondencia ente los xenitales y lo que su mente-yos diz que son. D’ehí’l titular de la noticia “Mané por fin es un hombre”.

Per otru llau, ta la manipulación de la información ufría pol periódicu a los sos llectores. Entrugando’l entrevistador polos detalles relacionaos cola operación a la que foi sometíu la respuesta foi qu’a esi tipu de preguntes nun iba a retrucar porque no yera la so intención alimentar morbosidaes y sensacionalismos. Sin embargu, la noticia finalmente espublizada fai referencia a un cambiu de xenitales y a una implantación de pene. Una preba determinante de que la entrevista nun siguió los derroteros marcaos  polos que se publicó ye que la propia periodista reconoció telefónicamente sacar de contextu y sobredimensionar comentarios que nun formaben parte d’ ella.

Llamentamos tener que desmentir a LNE. La ciruxía a la que se fai referencia na noticia nun esistió. Poro, trátase d’una divagación de la entrevistadora que nun ye capaz de oyir lo que se-y diz y se queda en idegues morboses y preconcebíes.

Posteriormente, la entradilla na que l’entrevistáu fai referencia a que’l coste de la so operación “es simple calderilla para el presupuesto de las arcas públicas” lleva una connotación claramente maliciosa cola idega de fomentar reacciones como les que aparecen nos comentarios a la noticia na web del periódicu. Trátase de xenerar enfrentamientos ente persones y colectivos necesitaos de ciertes prestaciones procedentes del serviciu públicu sanitariu. Desgraciadamente, esi oxetivu cubrióse a la vista de les múltiples intervenciones negatives recoyíes na web.

Sentimos tener que recordar, a estes altures, que les persones transexuales son tamién poseedores de plenos derechos sociales y ciudadanos con tolo que d’ellos se desprende. Nuna sociedá democrática, tener qu’acudir a esti tipu de reflexiones ye un indicativo de les carencies esistentes nel pensamientu d’un sector de la ciudadanía (y, polo visto y remitiéndonos a los fechos que comentamos, tamién de LNE).

Gustaríanos creer qu’esiste en LNE una voluntá por deprender y camudar. Desafortunadamente, lo vemos con escepticismu anque non por ello vamos a dar la batalla por perdida. Los avances nos derechos del colectivu LGTB ficíeronse ensin el sofitu, nin siquiera la complicidá, de LNE. Aún asina, son un fecho incuestionable.

Share Link: