Too ello, cola mayor actualización de cifres, cuantificación de la magntitú y aportando datos nuevos abondo. La obra d'Antonio Martínez afítase nel trabayu d’archivu y nel estudiu de la bibliografía esistente que da como resultáu una investigación rigurosa que si bien nun ye definitiva ye la aportación más completa pal conocimientu y l’estudiu d’esti procesu que tuvo como protagonistes a miles d’asturianos y asturianes.

Antonio Martínez Fernández (Neda, A Coruña, 1980) ye Llicenciáu n’Hestoria pola Universidá d’Uviéu y Profesor de Ciencies Sociales.  Si bien esti ye'l so primer llibru, Martínez tien publicaos dellos artículos históricos na revista N’AST. Cartafueyos d’ensayu como 'Unes notes sobre los refuxaos y la política sobre población refuxada n’Asturies na Guerra Civil (1936-1937)' o  'El Centru Asturianu de Cataluña na guerra civil ', una reseña n’Erada. Revista d’Historia Contemporanea que saldrá nel númberu 3 o delles collaboraciones n’otres revistes como La Sidra.

Espublizatur abre con esta investigación histórica la so coleición d'investigación cola que quier ufrir un espaciu editorial a investigadores p'asoleyar los sos trabayos n'asturianu. Esta coleición ta abierta a investigaciones de disciplines estremaes y con ella n'Espublizastur quieren dar puxu a la produición científica n'Asturies, n'asturianu y sofitar a los investigadores xóvenes. D'otra manera, Espublizastur tien abiertes tamién coleiciones d'ensayu n'asturianu (Ensayu), de narrativa n'asturianu, de tornes lliteraries (Caduerna), de tornes d'ensayos (Camilo Cienfuegos) a les que s'amestarán otres como la de poesía n'asturianu.