L’estrenu tien la fecha marcada dende cuantayá, la película ta en procesu de rodaxe y el productu final pue ser un 'remake' d’otres películes anteriores o una película que ruempa dafechu coles produiciones dramátiques ambientaes nel ‘Principado’, acoyíes con indiferencia mayormente pol públicu y con recaldación probe en taquilla. La produición asturiana pasa hores baxes y les grandes superproduiciones españoles atropen les sales de cine y cuasique toles plataformes audiovisuales gracies a distrubuyidores poderoses y los grandes grupos empresariales que les sofiten.

La película ‘2011’ basada na fecha de la fin del mundu marcada nuna vieya llenda ástur ta yá filmándose. El guión, el repartu, etc... nun son conocíos entovía. La escena patria cunta con bonos y esperimentaos actores, guionistes, productores, direutores, cámares,… que de participar en ‘2011’ ésta película podríe convertise nun revulsivu pa tol sector, nuna superproduición asturiana y podría francer la dinámica probe de les últimes produiciones d’estos años.

2011 ye un añu importante, nelli sabremos si la vieya llenda ástur de la fin del mundu ye cierta –como suel pasar nel mundu del cine nun lo va ser, anque nunca nun se sabe - y l’anunciu del entamu del rodaxe de la película ‘2011’ ta llamando l’atención del públicu más cinófilu y tamién del que nun lo ye tanto. Cuando s’asoleye’l repartu, la direición, la produición, téunicos,..  ye posible, si ye bonu, que pueda ilusionar al espectador mediu asturianu. Y si’l sector asturianu se xunta pa facer d’esta película la más importante del sieglu, nun hai que descartar que pueda algamar dalguna nominación nel Festival ‘Junta General del Principado’, nominaciones y gallardones qu'atropen dafechu les superproduiciones españoles de les trés grandes productores del ramu y a les que se podría xunir una cuarta con un cine cuasique más uniformizador y asturfóbicu.

La pequeña escena asturiana tien que mirar si convién facer de ‘2011’ una película pa recordar, ufrir dalgo rompedor que pueda optar a premios en festivales o siguir cola llinia de películes participantes na seición non oficial y fuera de concursu. Los que-yos presta’l cine persaben que nesto nun ye too Festivales y Premios, qu’hai muncho más, arte, divulgación, pedagoxía,…que’l trabayu nun se fai namás que pa ganar gallardones, pero’l que ta nello tamién sabe que los premios son importantes y ayuden a poder facer tolo demás.

Los estremaos axentes que componen el sector tienen que valorar lo que-y convién al cine astur de cara a un futuru meyor si facer un ‘remake’ o una película que sía un puntu d’inflexón, qu’enganche al públicu y por qué non qu’opte a representar a Asturies nos grandes festivales.

Por si quedaben duldes, non, nun tamos falando de cine.

Share Link: